Bakıda 2-ci “Sea Breeze Investment Forum” keçirildi®

Bakıda 2-ci "Sea Breeze Investment Forum” keçirildi®

Mayın 30-da "Sea Breeze” kurort şəhərciyində ikinci "Sea Breeze Investment Forum” beynəlxalq investisiya forumu keçirildi. Azərbaycanda daşınmaz əmlaka yatırım və ölkəmizin investisiya potensialının müzakirə olunduğu forumda Rusiya, Qazaxıstan, Türkiyə, Hindistan, İsrail və digər ölkələrdən qonaqlar da iştirak etdilər. Forumdan öncə Emin Ağalarovun rəhbərliyi ilə kurort şəhərciyi boyunca xüsusi ekskursiya keçirildi. Ardınca isə Azərbaycan Respublikasının İqtisadiyyat naziri Mikayıl Cabbarovun iştirakı ilə unikal "Caspian Dream Liner” layihəsinin təməli qoyuldu.

Forumu "Agalarov Development” şirkətinin prezidenti, "Sea Breeze Resort”un təsisçisi və sahibi Emin Ağalarov açdı və kurort şəhərciyi barədə, eləcə də qarşıya qoyulmuş məqsədlər və reallaşdırılan layihələr haqda məlumat verdi. "Sea Breeze” tədricən əsl memarlıq sərgisinə çevrilir – hər yeni kompleks unikallığı ilə təəccübləndirir. Tezliklə burada binaların sayı 150-yə çatacaq və hər layihənin öz fəlsəfəsi var. Bu, "Sea Breeze”in unikal yanaşmasıdır", – deyə Emin Ağalarov bildirib. 

"Ölkəmiz bütün Cənubi Qafqaz üçün sabitlik modelidir. İndi əsas vəzifə iqtisadiyyatı şaxələndirməkdir: biz təhsilə, səhiyyəyə və əlbəttə ki, turizmin inkişafına böyük diqqət yetiririk. Biz "Sea Breeze” ilə əməkdaşlıqdan və bu kompleksə artan maraqdan çox məmnunuq”, – deyə İqtisadiyyat naziri Mikayıl Cabbarov bildirib.

Forumda turizm və qonaqpərvərlik sahələrinə də xüsusi diqqət yetirildi. Belə ki, "Sea Breeze”in Baş direktoru Fuad İbrahimbəyov və Azərbaycan Turizm Bürosunun Baş icraçı direktoru Florian Zenqstşmid arasında Azərbaycanda vahid bron xidmətinin yaradılması məqsədilə əməkdaşlıq sazişi bağlandı. Dövlət Turizm Agentliyinin sədri Fuad Nağıyev ölkəmizin turizm sahəsi üzrə sürətlə artan göstəricilərini qeyd edərək bildirdi ki, qarşıda duran əsas məqsəd 2026-cı ilədək xaricdən Azərbaycana gələn turistlərin sayını 4 milyona, yerli turistlərin sayını isə 6 milyona çatdırmaqdır. Emin Ağalarov isə qarşıdan gələn COP29 tədbirində "Sea Breeze”in 5 minə qədər qonağı qəbul edəcəyini qeyd etdi.

"The Grand Sea Breeze”in yeni tədbir zalında baş tutan forumda Dövlət Şəhərsalma və Arxitektura Komitəsinin sədri Anar Quliyev, Azərbaycanda İxracın və İnvestisiyaların Təşviqi Fondunun (AZPROMO) icraçı direktoru Yusif Abdullayev, "ABB Bank”ın İdarə Heyətinin sədr müavini, İdarə Heyətinin üzvü Elmir Həbibullayev, "Commonwealth Partnership”in İdarəedici partnyoru Sergey Ryabokobılko, "Nardaran Invest”in İdarəedici partnyoru Andrey Perequdov, "Sea Breeze Resort”un kommersiya direktoru Ayaz Tağıyev də çıxış etdilər və Azərbaycanda daşınmaz əmlak sahəsində son illərdə müşahidə olunan inkişaf və "Sea Breeze”in bu xüsusda rolundan bəhs ediblər. Qeyd edək ki, forum çərçivəsində "Sea Breeze” ilə "ABB Bank” arasında tərəfdaşlıq memorandumu da imzalandı. 

"Sea Breeze Investment Forum” artıq ikinci dəfə keçirilir. Ötən illə müqayisədə tədbirə olan maraq daha da artıb və forum daşınmaz əmlak sahəsi üzrə regionun mühüm hadisələrindən birinə çevrilib.

"Sea Breeze” kurort şəhərciyində artıq 12 mindən çox insan yaşayır. Burada sakinlər və qonaqların rahatlığı, təhlükəsizliyi və istirahəti xüsusi diqqət mərkəzində saxlanılır. Hazırda şəhərciyin ərazisində 100-dən çox yaşayış binası, onlarla kommersiya və ictimai infrastruktur obyekti mövcuddur.