Azərbaycanda güzəştli biznes kreditlərinin həcmi artırıla bilər

İqtisadiyyat / 11.03.2018 16:06

Azərbaycan İqtisadiyyat Nazirliyi nəzdində Sahibkarlığa Kömək Milli Fondu (SKMF) 2018-ci il üçün biznesin güzəştli kreditləşməsinin həcmini artıra bilər.

Bu barədə Trend-ə SKMF-un direktoru Şirzad Abdullayev məlumat verib.

Azərbaycanın 2018-ci il üçün təsdiq olunmuş dövlət büdcəsinə əsasən, bu il SKMF xətti ilə 170 milyon manat dəyərində güzəştli kreditlərin ayrılması planlaşdırılır.

"Bizim əlavə maliyyə vəsaitlərimiz var. Yəni, biz öz tərəfimizdən 2018-ci ildə maliyyələşdirilmənin həcmini 200 milyon manatadək artıra bilərik. Bu məsələdə hər şey banklar və sahibkarlar arasında razılaşmalardan asılıdır", - deyə o qeyd edib.

SKMF direktoru həmçinin əlavə edib ki, təlabatın yarandığı halda güzəştli kreditləşmənin həcmi artırıla bilər.

Qeyd edək ki, SKMF 1992-ci ildə yaradılıb.Sahibkarlara kreditlərin verilməsi müvəkkil banklar və bank olmayan kredit təşkilatları vasitəsi ilə həyata keçirilir. 2017-ci ildən başlayaraq SKMF güzəştli kreditləşdirilməni yalnız qaytarılmış vəsaitlər hesabına ayırır.

1992-2017-ci illər ərzində sahibkarlara SKMF xətti ilə ümumi dəyəri 4,5 milyard manat təşkil edən layihələrin həyata keçirilməsi məqsədi ilə 2,1 milyard manat məbləğində güzəştli kreditlər verilib. Kreditlər 34 600 sahibkara təqdim olunub.

Oxunub: 306