Aprel döyüşləri: Düşmən ordumuzun gücü qarşısında tab gətirə bilmədi - VİDEO

XƏBƏR / 02.04.2018 22:41

Bu gün Azərbaycan ordusunun işğalçı Ermənistan üzərində qazandığı şanlı qələbənin ikinci ildönümüdür. 2016-cı il aprel ayında ordumuz 4 günlük döyüşlərdə 2000 hektar ərazisini işğaldan azad edib və bəzi strateji yüksəkliklər düşməndən təmizlənib. Həmin döyüşlərdə iştirak edərək ağır yaralanan polkovnik-leytenant Elşən Qarayev "XəzərXəbər”ə xatirələrini danışıb.

Hərb tariximizin şanlı səhifəsi olan aprel döyüşlərindən 2 il ötür.

2016- cı ilin aprelin 1-dən 2 -sinə keçən gecə düşmən cəbhə boyu zonada təxribat törədərək mövqeylərimiz və yaşayış məntəqələri atəşə tutulub,cəbhə xəttini pozmağa cəhd göstərib. Buna cavab olaraq ordumuz hərəkətə keçıb...Goranboy rayonu və Naftalan şəhərinə təhlükə yarada biləcək Talış məntəqəsi ətrafında, cənubda isə Horadiz şəhəri və Araz çayı boyu bəzi kəndlərin düşmən təhlükəsindən qorunması məqsədilə Lələtəpə yüksəkliyi və onun ətrafındakı strateji cəhətdən mühüm ərazilər azad edildi.

Məhz Lələtəpə yüksəkliyinin azad edilməsində böyük şücaət göstərən və həmin döyüşlərdə minaya düşərək ayağının birini itirən polkovnik-leytenant Elşən Qarayev düşmənin ordumuzun gücü qarşısında tab gətirə bilmədiyinı deyir.

Ermənistan silahlı qüvvələri bu döyüşlərdə böyük itkilərə məruz qaldı. 300-dən çox düşmən məhv edildi və 500-dən çox hərbi qulluqçusu da yaralandı. Qarşı tərəfin 30-dək tankı və digər zirehli texnikası, 25-dən artıq artilleriya qurğusu sıradan çıxarıldı, Madagiz yaşayış məntəqəsində yerləşən qərargahı və əsas hərbi hissələri məhv edildi. Ağdərə-Madagiz, Cəbrayıl istiqamətindəki yolların nəzarətdə saxlanılması imkanı əldə edildi.Aprel döyüşlərində ordumuz silahların yalnız kiçik bir qismindən istifadə edib.

4 günlük döyüşlərdə Azərbaycan Ordusu 2000 hektar ərazisini işğaldan azad edib.