Prezident seçkilərini 894 beynəlxalq müşahidəçi izləyəcək

XƏBƏR / 11.04.2018 09:03

Aprelin 11-də keçiriləcək Azərbaycan Respublikası Prezidenti seçkilərini 894 beynəlxalq müşahidəçi izləyəcək. Onlar 61 beynəlxalq təşkilatı təmsil etməklə 59 ölkənin vətəndaşlarıdır. Seçkilər 125 seçki dairəsi üzrə 5641 seçki məntəqəsində keçiriləcək. Səkkiz namizədin iştirak edəcəyi seçkiləri 51 xarici KİV-in 118 təmsilçisi işıqlandıracaq.

Carci.tv xəbər verir ki, bu barədə Mərkəzi Seçki Komissiyasının (MSK) sədri Məzahir Pənahov aprelin 10-da keçirdiyi mətbuat konfransında məlumat verib.

MSK sədri deyib ki, 4 təşkilat seçkilərdə "exit-poll” keçirəcək. Onların arasında ABŞ və Fransadan bu sahə üzrə peşəkarlar da var.

Qeyd edilib ki, aprelin 11-də səhər saat 8:00-da məntəqələr açıq elan olunacaq. Gün ərzində səsvermənin gedişi ilə bağlı 5 dəfə açıqlama veriləcək. Min seçki məntəqəsində veb-kameralar quraşdırılıb. Bu isə seçki məntəqələrinin 18 faizini əhatə edir. Bu təcrübə 2008-ci ildən tətbiq olunur. Bu veb-kameralar vasitəsilə bütün seçki prosesi onlayn rejimdə nümayiş etdiriləcək. Dünyanın istənilən yerindən MSK-nın saytına daxil olub heç bir məhdudiyyət olmadan seçki prosesini izləmək mümkündür.

Diqqətə çatdırılıb ki, Mərkəzi Seçki Komissiyası seçki prosesi üçün 38 normativ hüquqi sənəd qəbul edib. Seçkilərlə bağlı müxtəlif maarifləndirici tədbirlər görülüb. Cəzaçəkmə müəssisələrində, müalicə mərkəzlərində seçki prosesinin təşkili üçün müvafiq olaraq Ədliyyə və Səhiyyə nazirlikləri ilə birgə işlər görülüb.

Oxunub: 437