Avropada Mühafizəkarlar və İslahatçılar Alyansının Bakı sammiti keçirilib - VİDEO

RƏSMİ / 10.06.2018 10:36

"Ümid edirəm ki, Avropa Mühafizəkarlar və İslahatçılar Alyansı Azərbaycan torpaqlarının işğalı faktına adekvat qiymət verəcək".

Xezerxeber.az-ın məlumatına görə, bunu prezident İlham Əliyev Avropa Mühafizəkarlar və İslahatçılar Alyansının Bakı Sammitinə etdiyi müraciətdə qeyd edib. Prezidentinin ictimai-siyasi məsələlər üzrə köməkçisi Əli Həsənovun oxuduğu müraciətdə ölkəmizin qazandığı uğurlardan bəhs edilib və sammitin işinə uğurlar arzulanıb.

Tədbirdə çıxış edən Milli Məclis sədrinin I müavini Ziyafət Əsgərov parlamentin Azərbaycan həqiqətlərinin dünyaya çatdırılması üçün gördüyü işlər haqqında qısa məlumat verib və Dağlıq Qarabağ münaqişəsinin həlli yollarından danışıb.

Çıxış edən Avropa Mühafizəkarlar və İslahatçılar Alyansının prezidenti Yan Zahradil Avropa Şurasında Azərbaycanla bağlı birtərəfli və qərəzli qərarlar qəbul edildiyini və buna son qoymaq lazım olduğunu bildirib. O, Azərbaycanın geosiyasi proseslərdə, nəqliyyat, enerji məsələlərində çox ciddi rol oynadığını da əlavə edib.

Tədbirdə çıxış edən millət vəkili, Bütöv Azərbaycan Xalq Cəbhəsi partiyasının sədri Qüdrət Həsənquliyev Avropada Mühafizəkarlar və İslahatçılar Alyansını Cənubi Qafqazdakı münaqişələrə həssas yanaşmağa çağırıb.

Sammit çərçivəsində enerji təhlükəsizliyi, iqtisadi azadlıq, rəqəmsal iqtisadiyyat, təhsil transformasiyası, nəqliyyat və s. mövzular ətrafında debatlar keçirilib.

Xezerxeber.az mövzu ilə bağlı daha ətraflı videomaterialı təqdim edir: