Zaqatalada I Beynəlxalq fındıq, qoz və şabalıd festivalı keçirilib - VİDEO

Zaqatala rayonunda kənd təsərrüfatı üçün ənənəvi sahələrdən olan fındıqçılığın, həmçinin qərzəkli meyvəçiliyin daha geniş təbliğ edilməsi məqsədilə sentyabrın 29-da I Beynəlxalq fındıq, qoz və şabalıd festivalı keçirilib.

Xezerxeber.az-ın məlumatına görə, tədbir Zaqatala rayon İcra Hakimiyyətinin təşkilatçılığı ilə baş tutub.

Festivalın açılış mərasimi Zaqatala şəhərindəki "Dədə Qorqud" meydanında keçirilib.

Tədbirdə Azərbaycanda fəaliyyət göstərən 15-ə yaxın xarici ölkə səfirliyinin rəhbər və təmsilçiləri, nazirlik və dövlət qurumlarının nümayəndələri, Milli Məclisin deputatları, həmçinin fındıq istehsalçıları, şəhərin qonaqları və rayon sakinləri iştirak ediblər.

Festivalın keçirilməsi rayonda Bayram ab-havası yaradıb.

Qonaqlar rayon ictimaiyyəti ilə birlikdə "Dədə Qorqud" meydanında yaradılan "Kənd evi"ndə fındıq və qoz qabığı ilə sobanın yandırılması, fındığın və şabalıdın qovrulması, şabalıdın saxlanılma qaydası, təndirdə fındıq çubuqlarının yandırılması, at arabasının hazırlanması, müxtəlif milli xörəklərin bişirilməsi prosesini izləyiblər. Festival iştirakçıları həmçinin fındıq emalı və ixracı ilə məşğul olan müəssisələrin istehsal etdiyi məhsullarla tanış olub, rəsm və əl işləri sərgisinə, tətbiqi sənət nümunələrinə baxıblar.

Festivalın sonunda fındıq, qoz və şabalıdla bağlı müsabiqə qalibləri mükafatlandırılıb.

Tədbirə Zaqatala Tarix-Mədəniyyət Qoruğunun ərazisindəki meydanda keçirilən bədii proqramla yekun vurulub.

Xezerxeber.az mövzu ilə bağlı daha ətraflı videomaterialı təqdim edir: