Neft bahalaşa bilər - VİDEO

İqtisadiyyat / 02.12.2018 16:40

Bu ilin iyulundan başlayaraq neftin qiyməti kəskin şəkildə ucuzlaşmağa başlayıb. Səbəb OPEC-in hasilatın artırılması ilə bağlı qərarı idi. Təbii ki, bu tendensiyaya təsir edən müxtəlif siyasi amillər də olub. Amma gedişat onu göstərir ki, neft hasilatının artırılması "qara qızıl"ı ucuzlaşdırıb. İndi OPEC vəziyyəti düzəltmək üçün hasilatın azaldılmasını tövsiyə edib. Amma yekun qərar növbəti həftə baş tutacaq iclasdan sonra bəlli olacaq.

Carcitv.az-ın məlumatına görə, 2019-cu ildə neftin qiymətinin yüksək olacağı ilə bağlı ehtimallar yüksəlir. "Bloomberg" agentliyinin yaydığı xəbərə görə, OPEC Katibliyi üzv ölkələrə gələn il neft hasilatını 2018-ci ilin oktyabrı ilə müqayisədə sutkada 1,3 milyon barel azaltmağı tövsiyə edib. Məlumatda qeyd edilib ki, neft istehsalının azaldılmasına əsas səbəb zəif tələbat və ABŞ-da şist neft hasilatının intensiv artımıdır.

Tövsiyə gələn həftə Vyanada OPEC+ Nazirlər Monitorinq Komitəsinə təqdim ediləcək.

İqtisadçı ekspert Rəşad Həsənov deyir ki, OPEC-in hasilatın azaldılması ilə bağlı verdiyi tövsiyə "qara qızıl"ın qiymətinin bahalaşacağı ilə bağlı ümidləri artırır. Hasilatın hansı səviyyədə olacağı OPEC ölkələrinin dekabrin 6-da, OPEC-ə üzv olmayan ölkələrin isə 7 dekabrda qəbul edəcəyi qərardan asılı olacaq.

Ekspert deyir ki, bazarda təklifin artması OPEC-ə üzv olan və olmayan ölkələr üçün də sərfəli olmadığından hasilatın azaldılacağı gözləniləndir.

Görünən odur ki, indi bütün dünyanın diqqəti OPEC-in növbəti həftə baş tutacaq iclasına yönəlib.

Xezerxeber.az mövzu ilə bağlı daha ətraflı videomaterialı təqdim edir: