Polis əməkdaşları arasında keçirilən qol güləşi və ağırlıq daşlarının qaldırılması yarışının qalibləri mükafatlandırılıb

CANLI TV / 02.03.2019 18:36

CarciTV xəbər verir ki, Daxili İşlər Nazirliyinin (DİN) İdmаn Cəmiyyətində qol güləşi (armreslinq) və ağırlıq daşlarının qaldırılması yаrışı keçirilib.

DİN-in mətbuat xidmətindən bildiriblər ki, əvvəlcə Xocalı faciəsi qurbanlarının xatirəsi bir dəqiqəlik sükutla yad edilib.

DİN İdman Cəmiyyətinin sədri, Olimpiya, dünya və Avropa çempionu, polis polkovniki Zemfira Meftaxətdinova yarışın açılış mərasimində çıxış edərək Azərbaycanın öz tarixinin çox şərəfli, inkişaf və tərəqqi dövrünü yaşadığını bildirib. Azərbaycanın bugünkü müasir inkişafının əsasında xalqımızın ümummilli lideri Heydər Əliyevin uzaqgörən siyasətinin dayandığını qeyd edən Z.Meftaxətdinova deyib ki, bu gün bu uğurlu inkişaf strategiyası Prezident İlham Əliyevin rəhbərliyi ilə inamla davam etdirilir. Dövlətimizin başçısının diqqəti biz idmançıları yeni qələbələrə səsləyir.

İdman cəmiyyətinin sədr müavini, polis polkovniki Elçin Rüstəmov yarışın qaydaları barədə iştirakçıları və komanda rəhbərlərini məlumatlandırıb. Bildirilib ki, əsasən dənizçilər arasında yaranan qol güləşi idman növü kimi yüz ilə yaxındır tanınır. İdman daşlarının qaldırılması hərəkəti pəhləvanlardan miras qalıb. Güc, dözüm və çevikliyi təcəssüm etdirən bu idman növü indi də orduda, xüsusi təyinatlılar və dənizçilər arasında ən sevilən yarışdır. Fiziki gücün yoxlamağın ən asan və sadə üsulu kimi tanınan bu idman növündə polislərimiz əvvəlcə nümunəvi çıxışlar göstəriblər.

DİN İdman Cəmiyyətində keçirilən bu yarışda ərazi polis orqanları, nizami hissə və tədris müəssisələrini təmsil edən ümumilikdə 10 komandadan 80 idmançı qələbə uğrunda mübarizə aparıb.

Gərgin idman mübarizəsi şəraitində keçən yarışlarda komanda hesabında ilk üçlükdə Daxili Qoşunların Baş İdarəsinin (DQBİ), Baş Mühafizə İdarəsinin (BMİ) və Sumqayıt Şəhər Polis İdarəsinin əməkdaşları qərarlaşıblar.

Yarışda Azərbaycan Qol Güləşi Federasiyasının nümayəndələri hakimlik ediblər.

Qol güləşi yarışında müvafiq olaraq öz çəki dərəcələrində güclərini sınayan Elnur Vəliyev (65 kq, DQBİ), Röyal Abbaslı (70 kq, DQBİ), Rəşad Muradov (75 kq, BMİ), Ənvər Əmirli (80 kq, DQBİ), Rasim Şirinov (85 kq, Sumqayıt ŞPİ), Zamir Səfərbəyov (90 kq, BMİ) və Vüsal Məmmədov (+90 kq, BŞBPİ) yarışın baş mükafatını qazanıblar.

Ağırlıq daşlarının qaldırılmasında Rəşad Həsənov (65 kq, Naxçıvan MR DİN), Akif Müslümov (70 kq, DQBİ), Elvin Dövlətov (75 kq, DQBİ), Alim Sevindikzadə (80 kq, Sumqayıt ŞPİ), Cavid Musayev (85 kq, ƏÇPA), Əli Bayramov (90 kq, DQBİ) və Azər İbrahimov (+90 kq, Gəncə Şəhər BPİ) birinci yerə layiq görülüblər.

Yarışın idarə olunmasında polis polkovnik-leytenantları Elnur Həsənov, Seymur Qurbanbəyov, Zaur Məcidov, Mahir Əhmədov, polis kapitanları Munir Orucov və Aydın Həşimov iştirak ediblər.

Mükafatlandırma mərasimində çıxış edən idmanın təşkili bölməsinin rəisi, polis polkovnik-leytenantı Mülayim Xıdırov ötən il MDB dövlətlərinin güc qurumları arasında idmanın daş qaldırma növü üzrə turnirə ilk dəfə qatılan DİN-in komandasının yüksək nəticələr göstərərək ümumi hesabda bürünc medal qazandığını diqqətə çatdırıb. O, əməkdaşların hazırlıq səviyyəsinin yüksək olmasını, polis idmançılarımızın təcrübələrinin ildən-ilə artdığını deyib.

Sonda qaliblərə medallar, diplomlar və qiymətli hədiyyələr təqdim olunub.

Oxunub: 489

SON XƏBƏRLƏR

2025-04-19

03:30 Prezident İlham Əliyev və birinci xanım Mehriban Əliyeva “Sea Breeze” istirahət mərkəzinin ərazisində həyata keçirilən layihələrlə tanış olublar