Milli Oftalmologiya Mərkəzində akademik Zərifə Əliyevanın 96 illiyinə həsr olunmuş konfrans keçirilib

XƏBƏR / 29.04.2019 16:06

Aprelin 29-da Səhiyyə Nazirliyi, akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin təşəbbüsü ilə akademik Zərifə Əliyevanın anadan olmasının 96 illiyinə həsr edilmiş "Oftalmologiyanın aktual məsələləri” mövzusunda elmi konfrans keçirilib.

carçıTV xəbər verir ki, əvvəlcə konfrans iştirakçıları Fəxri xiyabanda ulu öndər Heydər Əliyevin və akademik Zərifə Əliyevanın məzarlarını ziyarət ediblər. Ümummilli liderin və görkəmli oftalmoloq-alimin məzarlarına tər güllər düzülüb, əklillər qoyulub və əziz xatirələri dərin ehtiramla yad edilib.

Tədbirdə çıxış edən mərkəzin direktoru professor Elmar Qasımov Azərbaycanın tanınmış oftalmoloq-alimi, akademik Zərifə Əliyevanın oftalmologiya elminin inkişafında müstəsna xidmətləri olduğunu qeyd edib: "Zərifə Əliyeva vaxtilə Azərbaycanda geniş yayılmış traxomanın, dünya təcrübəsində birincilər sırasında peşə, xüsusilə kimya və elektron sənayelərində peşə fəaliyyəti ilə bağlı göz xəstəliklərinin öyrənilməsi, profilaktikası və müalicəsinə, habelə oftalmologiyanın müasir problemlərinə dair bir çox sanballı tədqiqatların müəllifidir. Görkəmli alimin 200-ə qədər elmi işi, 14 monoqrafiyası və 12 səmərələşdirici təklifi var. O, yüksəkixtisaslı səhiyyə kadrlarının hazırlanmasına böyük əmək sərf edib. Onun xeyirxah əməlləri, oftalmologiyanın inkişafına verdiyi töhfələr heç zaman unudulmayacaq".

Sonra mərkəzin elmi katibi, tibb elmləri doktoru Nazilə Rüstəmova tanınmış oftalmoloq-alimin həyatı və elmi fəaliyyəti ilə bağlı tədbir iştirakçılarına ətraflı məlumat verib.

Konfrans müxtəlif mövzularda məruzələrlə davam edib.

Oxunub: 362