XİN Rusiya helikopterinin vurulması ilə bağlı bəyanat yaydı - KTMT-dən Rusiyaya məxsus təyyarənin vurulmasına reaksiya

CANLI TV / 10.11.2020 00:29

KTMT-dən Rusiyaya məxsus təyyarənin vurulmasına reaksiya

Kollektiv Təhlükəsizlik Müqaviləsi Təşkilatı Ermənistanda Azərbaycan hərbçilərinin Rusiya helikopterini vurması nəticəsində baş vermiş faciəvi hadisəyə münasibət bildirib.

"RİA Novosti”nin məlumatına görə, bu barədə təşkilatın mətbuat katibi Vladimir Zaynetdinov danışıb.

"Baş vermiş hadisə ilə bağlı ciddi narahatlığımızı çatdırır və həlak olan ekipaj üzvlərinin doğmalarına və yaxınlarına başsağlığı veririk. Atəşin haradan açıldığını göstərən araşdırmanın nəticələrini gözləyək”, - deyə V.Zaynetdinov bildirib.

V.Zaynetdinov xatırladıb ki, KTMT dəfələrlə münaqişə tərəflərini atəşkəsə çağırıb.

***

XİN Rusiya helikopterinin vurulması ilə bağlı bəyanat yaydı

Azərbaycan Respublikasının Müdafiə Nazirliyinin Rusiya Federasiyasının Müdafiə Nazirliyindən aldığı məlumata əsasən bu ilin 9 noyabr tarixində saat 18.30 da Ermənistan-Azərbaycan sərhədinin Naxçıvan hissəsində Rusiya Federasiyasına məxsus Mi-24 hərbi helikopteri vurulub.

Bu barədə Azərbaycan Respublikasının Xarici İşlər Nazirliyinin bəyanatında deyilir.

Bəyanatda bildirilir:

Bununla bağlı aşağıdakıları qeyd etmək lazımdır:

-helikopter Ermənistan-Azərbaycan Dağlıq Qarabağ münaqişəsi zonasında aktiv hərbi döyüşlərin davam etdiyi bir vaxtda Ermənistan-Azərbaycan dövlət sərhədinin tam yaxınlığında uçuşu həyata keçirib.

-uçuş günün qaranlıq vaxtında, aşağı hündürlükdə, hava müdafiəsi sisteminin radar müşahidəsindən kənar zonada həyata keçirilib.

-bundan öncə həmin ərazidə Rusiya Federasiyası Hərbi Hava Qüvvələrinin helikopterləri müşahidə edilməyib.

Qeyd olunan amilləri və bölgədəki gərgin vəziyyəti, habelə erməni tərəfinin mümkün təxribatları ilə əlaqədar yüksək döyüş hazırlığını nəzərə alaraq, növbətçi hərbi bölüm tərəfindən atəşin açılması qərarı verilib.

Təsadüfi xarakter daşıyan və Rusiya tərəfinə qarşı yönəlməyən bu faciəvi hadisə ilə bağlı Azərbaycan tərəfi Rusiya tərəfinə üzrxahlığını bildirir.

Azərbaycan tərəfi həlak olan ekipaj üzvlərinin ailələrinə dərin başsağlığı bildirir və xəsarət alanların tezliklə sağalmalarını diləyir.

Azərbaycan tərəfi müvafiq kompensasiyanın ödənilməsinə hazır olduğunu bildirir.

Oxunub: 295