Hikmət Hacıyevdən Polad Bülbüloğluna etiraz

XƏBƏR / 14.11.2020 21:43

"Rusiya Federasiyası Silahlı Qüvvələrinə məxsus helikopterlə əlaqədar baş vermiş faciəvi hadisə ilə bağlı noyabrın 9-da Azərbaycan Respublikasının Prezidenti İlham Əliyev və Rusiya Federasiyasının Prezidenti Vladimir Putin arasında telefon danışığı olub.

Həmin gün Azərbaycan Respublikasının Xarici İşlər Nazirliyi müvafiq açıqlama ilə çıxış edib. Azərbaycan Respublikasının Baş Prokurorluğu tərəfindən bu təsadüfi faciə ilə əlaqədar cinayət işi açılıb. Azərbaycanın və Rusiyanın Baş prokurorları arasında istintaqın gedişi ilə əlaqədar telefon danışığı olub. İstintaqın gedişi ilə bağlı qarşılıqlı məlumat mübadiləsi həyata keçirilir.

Azərbaycan Respublikasının Rusiya Federasiyasındakı səfirinin bu məsələ ilə bağlı verdiyi şərh yersizdir. Bu kimi hal Azərbaycan-Rusiya əlaqələrinə xələl gətirə bilməz".

"carciTV" xəbər verir ki, bu fikirləri Azərtac-a açıqlamasında Prezidentin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev bildirib.

"Həmçinin, məsələnin mahiyyətinə varmadan Azərbaycanın Rusiyadakı səfirinin Azərbaycanın Dağlıq Qarabağ bölgəsinin statusu ilə bağlı söylədikləri qəbuledilməzdir. Azərbaycanın xaricdəki diplomatik nümayəndəliklərinin rəhbərləri və digər rəsmi şəxsləri ölkənin rəsmi mövqeyinə və Prezident İlham Əliyevin yürütdüyü siyasətə zidd olan özbaşına açıqlamaların verilməsindən çəkinməlidirlər”, - deyə Prezidentin köməkçisi qeyd edib.

Xatırladaq ki, Azərbaycanın Rusiyadakı səfiri Polad Bülbüloğludur. Polad Bülbüloğlunun rus mediasına müsahibəsi zamanı jurnalistin, Azərbaycanın Rusiyaya məxsus helikopteri vurması ilə bağlı sualına verdiyi cavab Rusiya rəsmilərini hiddətləndirib.

Qeyd edək ki, P.Bülbüloğlu müsahibəsində həmin suala cavab olaraq bunları deyib: "Bu faciəvi bir qəzadır, amma müharibədir və müharibədə də hər şey ola bilər. Azərbaycan tərəfi hadisəyə dərhal reaksiya verdi, Azərbaycan Xarici İşlər Nazirliyi bu məsələ ilə bağlı açıqlama verdi, komissiya yaradıldı, səbəbləri öyrənilir. Səfir kimi, bütün lazımi Rusiya təşkilatlarına ciddi bir araşdırma aparıldığını və bütün tədbirlərin görüləcəyini bildirdim. Sonra liderlər danışdı və indi prokurorluqlar bu xoşagəlməz hadisənin təfərrüatlarını öyrənməyə çalışır. Ancaq bir daha demək istəyirəm ki, belə bir mühitdə hər şey ola bilər. Qurbanların ailələrinə dərin hüznlə başsağlığı verirəm. Azərbaycan tərəfi ailələrə və dövlətə dəymiş bütün zərərləri ödəməyə hazırdır".

Oxunub: 321