Xankəndidə ermənilərin YENİ HOQQALARI: cinayətkar Arayik və dəstəsi nəyə arxayındır?

XƏBƏR / 05.12.2020 15:24

Tofiq Zülfüqarov: "O ərazilərdə addım-addım Azərbaycanın suverenliyi bərpa olunmalıdır”

Ermənilərin Dağlıq Qarabağda qalması onları yaman həvəsləndirib. Hətta dekabrın 1-dən sonra da "artsaxın özünü müdafiə ordusu”ndan danışmağa başlayıblar.

"carciTV" xəbər verir ki, onların varlığını sübut edən fakt "özünümüdafiə ordusunun iki hərbçisi”nin Qarabağın şərqində baş verən partlayış nəticəsində ölməsidir. Paralel olaraq isə oyuncaq qurumun başçısı, haqqında cinayət işi açdığımız Arayik Aryutyunyan Ermənistanın müdafiə nazirini qəbul edir, görüşlər keçirir, "fərmanlar” verir, yeni "nazirlər” təyin edir.

Azərbaycanın qanuni ərazisində qanunsuz erməni hərbi birləşmələri daha nə qədər mövcud olacaq? Rus qoşunlarının Qarabağda yerləşməsindən sonra erməni siilahlı birləşmələri bu ərazilərimizi tərk etməliydi. Amma faktiki olaraq mövcudluqlarını saxlayıblar.

Əslində "artsax” rejimi bütün quldur dəstəsi ilə şələ-şüləsini yığıb İrəvana rədd olmalıydı. Ardınca rus mətbuatı, həmçinin ABŞ-ın "The New York Times” qəzetinin əməkdaşı Xankəndidə hazırladığı reportajda yazır ki, orada qalan ermənilərə Rusiya pasportu paylanacaq. Amma bu, ağızdan eşidilən və yaxud bir müxbirin qulaq verdiyi söhbətlərə istinad əsasında reportajı ola bilər. Çünki Qarabağın Rusiya ilə sərhədi yoxdur.

Hazırda Azərbaycanın Xankəndi şəhərində və rus sülhməramlılarının qoruduğu ərazidə qondarma "dqr”in bayraq əvəzi əski parçası hələ də qalmaqdadır. Hazırkı "taym-aut”dan istifadə edən erməni təbliğat vasitələri isə bu faktı manipulyasiya etməyə başlayıblar. Araik Arutyunyan da özünü "dqr prezidenti” kimi təqdim etməkdə davam edir.

Hətta separatçı-terrorçu Ermənistanda fəaliyyət göstərən mobil operator təmsilçiləri ilə görüşüb. Onlara Azərbaycanın Qarabağ bölgəsində "tam fəaliyyət” (rominqsiz nəzərdə tutulur – E.S.) təklif edilib. O bəyan edib ki, 2021-ci ildən "dqr” Ermənistandakı xidmətlə birləşdiriləcək, rominq xidməti ləğv ediləcək.

Göründüyü kimi, təxribat xarakterli addımlar davam etməkdədir. Bəs bu separatçı erməni hərbi birləşmələri nə zaman ərazilərimizdən çıxacaqlar?

Sabiq xarici işlər naziri, politoloq Tofiq Zülfüqarov bildirib ki, bütün bunlar təxribat məqsədi daşıyan bəyanatlar və məlumatlardır. Onun sözlərinə görə, erməni tərəfi bu situasiyadan sui-istifadə etməkdədir.

Politioloq hesab edir ki, münaqişənin həllində Ermənistan dövləti faktoru aradan götürülüb: "Ermənistanın Azərbaycana qarşı hərbi təcavüzünün böyük hissəsi aradan qaldırılıb və sülhməramlı qüvvələrin nəzarəti altında indentifikasiya prosesi baş verməlidir. Yəni oradakı xarici ölkələrə məxsus silahlı birləşmələr evakuasiya olunmalıdır. Qalan məsələlər isə bərpa olunmuş sərhədimizdə beynəlxalq səviyyədə danışıqlarla ola bilər. Məsələn, Naxçıvana gedilən yol və sair səpkidə danışıqlar mümkündür. Amma qalan tərəflər getməlidirlər. Çünki bura Azərbaycanın suveren ərazisidir”.

Sabiq nazirin sözlərinə görə, orada qalan prosesləri üçlük formatında həll edirik: "Yəni Rusiya-Türkiyə və Azərbaycanın iştirakı ilə qalan məsələləri həll edəcəyik. O ərazilərdə addım-addım Azərbaycanın suverenliyi bərpa olunmalıdır. Həmin qoşunlar çıxarıldıqdan sonra yerli əhalinin qeyri-qanuni hərbi birləşmələrini müəyyən edərək tərk-silah etməlidirlər. Üçtərəfli sazişin məntiqinə uyğun olaraq təhlükəsizlik funksiyası ordumuza, müşahidəçilərə və sülhməramlılara məxsusdur. Digər tərəf yoxdur, ola da bilməz! Ona görə qeyri-qanuni hərbi birləşmələr tərki-silah olmalıdır. Bu iş bitdikdən sonra digər proseslərə keçəcəyik – iqtisadi, siyasi, humanitar sahədə məsələlərin başlanması gözlənilir. Məqsəd Azərbaycanın suverenliyinin bərpasıdır. İnsanların tez-tez verdiyi suallardan biri bayraqdır. Bayraq suverenlik hüquqlarının rəmzidir. Amma suverenliyi təşkil edən məsələlər var. Bura valyuta, kommunal işlərin təşkili, işə götürmək məsələləri daxildir. Bu işlər də addım-addım reallaşdırılacaq”.

Oxunub: 291