Azərbaycanda karantin rejimi sərtləşdirilir?

CANLI TV / 02.03.2021 23:11

Son günlər ölkədə karantin rejiminin yenidən sərtləşdiriləcəyi, qapanmaların olacağı ilə bağlı müxtəlif məlumatlar yayılır. Bunu koronavirusa gündəlik yoluxma hallarında artımın olması və qarşıdan gələn Novruz bayramı günləri ilə əlaqələndirirlər.

Milli Məclisin Əmək və sosial siyasət komitəsinin sədri Musa Quliyev məsələ ilə bağlı bildirib ki, karantin rejimi ilə bağlı sərtləşmə və ya yumşalmaların olacağı barədə qərarı Nazirlər Kabineti yanında Operativ Qərargah verir.

"Ölkədəki vəziyyətlə bağlı ən dolğun məlumatlar onlardadır. Mən müşahidəçi və vətəndaş olaraq subyektiv fikrimi söyləyə bilərəm. Yaxşı olar ki, aprelin 1-ə qədər bu rejimdə qalaq. Yəni yenidən karantin rejiminin sərtləşdirilməsinə gedilməsin. İnsanlarımız psixoloji gərginlik keçirir, həm də iqtisadiyyatı düşünməliyik. Təklif edirəm ki, bayram günlərini bu qaydada keçirək. Aprelin 1-dən isə yumşalmalara gedilə bilər".

Komitə sədri hesab edir ki, indidən karantin rejiminin yumşaldılması tezdir: "Vaksinasiya tədbirləri davam edir. Səhiyyə işçisi olaraq insanlarımıza çağırış edirəm ki, peyvənd olunsunlar. Bu bəladan, çətinlikdən qurtulmaq üçün yeganə çıxış yolumuz budur. Əhalinin bir hissəsi vaksinasiya olunub, bir hissəsi olunmadıqda peyvəndin əhəmiyyəti, effekti də aşağı düşəcək. Aprelin 1-ə qədər vaksinasiya olunanların sayı bir qədər artar və yumşalmalara keçə bilərik".

M.Quliyev, eyni zamanda Novruz bayramı ilə əlaqədar vətəndaşlara çağırış edib.

"Bayram günləri ilə bağlı bütün vətəndaşlarımıza çağırış edirəm ki, karantin rejimini qorusunlar. Qəbir üstünə getmək, bayramlaşmaq kimi adətləri növbəti ilə saxlayaq, koronavirus bitsin, sonra edərik".

Oxunub: 354