Deputat: Dövlətimiz erməni terrorunun bütün dünyada ifşa olunması, terrorçuların cəzalandırılması üçün sistemli iş aparır

Deputat: Dövlətimiz erməni terrorunun bütün dünyada ifşa olunması, terrorçuların cəzalandırılması üçün sistemli iş aparır 

Xocalı rayonunun Fərrux kəndi ərazisində tapılmış insan qalıqları ermənilərin azərbaycanlılara qarşı törətdikləri çoxsaylı cinayətlərin sübutudur. Məlum olduğu kimi, Birinci Qarabağ müharibəsində itkin düşmüş 4000-ə yaxın soydaşımızın taleyi hələ də naməlum olaraq qalır. Təəssüf ki, Xarici İşlər Nazirliyi, Əsir və itkin düşmüş, girov götürülmüş vətəndaşlarla əlaqədar Dövlət Komissiyası tərəfindən erməni tərəfinə, Beynəlxalq Qızıl Xaç və Qızıl Aypara Cəmiyyətləri Federasiyasına (IFRC) adlı siyahıların dəfələrlə təqdim etməsinə rəğmən, qarşı tərəfdən itkin düşənlərin tapılması istiqamətində ciddi addımlar atılmayıb. Bütün bunlara baxmayaraq, dövlətimiz erməni terrorunun bütün dünyada ifşa olunması, terrorçuların cəzalandırılması üçün sistemli iş aparır.

Bu fikirləri Milli Məclisin deputatı Nəsib Məhəməliyev söyləyib.

Deputat qeyd edib ki, Prezident İlham Əliyev müxtəlif beynəlxalq müstəvilərdə, ayrı-ayrılıqda dövlət başçıları ilə görüşlərdə, Ermənistanın dövlət terroru ilə məşğul olan ölkə olmasını faktlarla onların diqqətinə çatdırıb. Azərbaycan hüquq-mühafizə orqanları tərəfindən Fərrux kəndində tapılan insan qalıqları və daha əvvəllər aşkarlanmış kütləvi məzarlıqların hər biri sənədləşdirilir və gələcəkdə cinayətkarların məhkəmə qarşısında cavab verməsi üçün maddi sübutlar toplanır. Vətən müharibəsində əsir götürülmüş ermənilərin arasında həmin cinayətkarların bir qisminin Azərbaycan məhkəmələri tərəfindən cəzalandırılmaları tarixi ədalətin bərpasıdır.

N.Məhəməliyev, həmçinin bildirib ki, tarix heç nəyi unutmur. Sülhsevər xalq olduğumuzdan tarixin müəyyən mərhələlərində unutqanlığa yol verilərək ermənilərin törətdikləri cinayətlərə göz yumulub. Bundan sonra nə unutqanlığa yol var, nə də ermənilərin göz yaşlarına. Hazırda dövlətimizin başçısı tərəfindən Azərbaycan xalqının milli maraqlarına, təhlükəsizliyinə, gələcəyinə, inkişafına, beynəlxalq nüfuzuna xidmət edən düşünülmüş strateji kurs həyata keçirilir. Bu da qeyd olunan məsələlərin həlli istiqamətində müsbət çalarlar yaradacaq.