“Param-parça illər” kitabının müzakirəsi

"Param-parça illər” kitabının müzakirəsi

 "carçıTV”-nin redaksiyasında Azərbaycanın Xalq şairi Vahid Əzizin "Param-parça illər” adlı kitabının ictimai müzakirəsi keçirilib. Kitaba müəllifin İkinci Qarabağ müharibəsi dövründə yazmış olduğu şeirlər və "Heyrət səcdəsi” adlı poema daxil edilib.

"Param-parça illər” kitabına eyni zamanda Vahid Əzizin Qarabağımızın düşmən əsirliyində olduğu zamanlarda ürək ağrısı ilə yazdığı bir sıra şeirlər də öz əksini tapıb.

Müzakirələr zamanı çıxışçılar xalq şarinin yaradıcılığında milli mənlik şüurunun inkişafı, vətənpərvərlik ruhunun gənclərə aşılanması, vətən həsrəti, millətə və dövlətə bağlılığın əhəmiyyəti haqqında danışıblar.

 "carciTV”-nin rəhbəri Rahib Kərimli şairin yaradıcılığında Vətənin hər daşının təbliğinin üstünlük təşkil etdiyini diqqətə çatdırıb. Vahid Əziz yaradıcılığında nəzər yetirdikdə gənclərimizin vətənpərvərlik hisslərinin tərbiyəsi altında inkişafı hər birimizi düşündürən məsələdir. Vahid Əzizin yaradıcılığı həm də bu baxımdan əhəmiyyətə malikdir. Şairin 44 günlük Vətən müharibəsindən sonra qələmə aldığı şerlərinin topladığı "Param-parça illər” kitabında vətənpərvərlik nümunəsi, xalqımızın Zəfər Qələbəsi tərənnüm edilir. Hesab edirəm ki, bu əsər Dövlət Mükafatına layiqli əsərdir”.

AMEA Dilçilik İnstitutunun direktoru  Nadir Məmmədli şairin yaradıcılığında vətənpərvərlik, vətən nisgili izinin açıq hiss edildiyini qeyd edib. Əlavə edib ki, şairin 2021-ci ildə çap edilən "Param-parça illər” adlı kitabı həm tarixi ədalət, həm də gənclərin vətənpərvər əhvali-ruhiyyədə böyüməsi baxımından uğurludir: "Vahid Əziz yaradıcılığının üstünlüyü ondadır ki, bu, real həyatla bağlıdır, canlıdır, olanların real şəkildə oxucuya çatdırılmasıdır. Hesab edirəm ki, sonuncu kitabı ən yüksək mükafatlara layiqdir”.

Ehtiyatda olan polkovnik Nizami İsmayılov da müəllifə daha böyük uğurlar arzulayaraq dedi ki, əsər 44 günlük vətən müharibəsindən sonra çap edilib və şair bununla qələbəyə öz töhvəsini verib: "Əsərdə müharibənin ayrı-ayrı nüanslarının poetik təsviri açıq şəkildə hiss edilir. Fikrimcə, bu, Vahid Əziz yaradıcılığında poetik və estetik zənginliyinin göstəricisidir. Əsgər silahla vuruşduğu kimi şair də əlindəki qələmlə vuruşur. Qənaətimcə, şair bu kitabı ilə yenidən poeziyada vətənpərvərlik mövzusunu diqqətə gətirir”.

Azərbaycan Ordusunun Hərbi Dəniz Qüvvələrinin xüsusi təyinatlı qüvvələrin kapitan-leytenantı "Dəniz pişiyi” ləqəbini qazanmış şəhid Fərrux Həşimovun anası  da söz alaraq öz növbəsində müəllifə təşəkkür edib və ona yaradıcılıq uğurları arzuladı.

Qeyd edək ki, digər çıxış edənlər də Vahid Əziz yaradıcılığına yüksək qiymət verib, onun 2021-ci ildə nəşr edilən kitabı haqqında müsbət fikirlər səsləndirdilər.