Türkiyədə 24 milyonluq şirkət quran Azərbaycanlı

CANLI TV / 13.05.2022 01:17

Sərxan Babayev Türkiyədə 24 milyonluq şirkət qurdu

"DET-AL Alüminium” MMC-nin sabiq baş direktorunun Siyahdeniz Turizm İnşaat Sanayi ve Ticaret Anonim adlı şirkətinin nizamnamə kapitalı 24 milyon 300 min TL təşkil edir

Son illər Türkiyədə Azərbaycanlı iş adamları tərəfindən yaradılan şirkətlərin sayı çoxalmaqdadır.

Türkiyə mətbuatı xəbər verir ki, yanvar ayında azərbaycanlı iş adamı Sərxan Babayev İstanbulun Şişli rayonunda nizamnamə kapitalı 24 milyon 300 min TL olan (5 milyon səkkiz yüz doxsan min manat) Siyahdeniz Turizm İnşaat Sanayi Ve Ticaret Anonim adlı şirkət yaradıb.

Sərxan Babayev Türkiyədə həmdə "Alva Donna” Şirkətlər Qrupunun və Antalya şəhərindəki məşhur "Shemall” ticarət mərkəzinin rəhbəri kimi tanınır.

Qeyd edək ki, Masallı rayonunun Mahmudavar kəndindən olan Sərxan Babayev 2019-cu ilə qədər ölkənin ən böyük metallurgiya kompleksi olan "DET-AL Alüminium” MMC-nin baş direktoru vəzifəsində işləyib.

Sərxan Babayev "DET-AL Alüminium” MMC-nin baş direktoru işlədiyi vaxt 2016-cı ildə Türkiyəyədə rus iş adamı kimi peyda olaraq Seyran Həsənov adlı şəxslə "Alva Donna” Şirkətlər Qrupunun səhmdarı olub. 2019-cu ildə isə "Alva Donna” Şirkətlər Qrupunun səhmləri Dubayda qeydiyyatda olan "Vertex İnverstments Limited” şirkətinə satılıb. Bundan sonra "Alva Donna” Şirkətlər Qrupu İdarə Heyətinin sədri vəzifəsinə Sərxan Babayev təyin edilib.

Bununla belə, 2019-cu ildən bu yana mətbuatda Sərxan Babayevlə bağlı hər hansı bir xəbərə rast gəlmək olmur. Bu isə Sərxan Babayevin "DET-AL Alüminium” MMC-nin baş direktoru vəzifəsini tərk edərək, Türkiyədə "Alva Donna” Şirkətlər Qrupunun rəhbərliyinə keçməsi ilə üst-üstə düşür.

Bildirək ki, ölkə mətbuatında Sərxan Babayevin adı yüksək vəzifəli məmurlardan birinin ən yaxın adamı kimi keçir. Onun vaxtı ilə "DET-AL Alüminium” MMC-nin baş direktoru vəzifəsinə məhz həmin məmur tərəfindən gətirildiyi iddia edilir.

Mənbə: Azsiyaset.com