Xocalını unutmadıq

CANLI TV / 27.02.2023 01:05

Xocalını unutmadıq

Ən böyük faciələrdən biri olan Xocalı soyqırımı xalqımızın genetik yaddaşında tarixi yer tutur. Xocalı soyqırımı xalqımıza qarşı törədilmiş genosiddir.

1992-ci il 26 fevral - Azərbaycan xalqı üçün ən dəhşətli günlərdən biri oldu . Erməni terrorçuları 366-cı alayın köməyindən istifadə edərək Xocalı qırğınını törətdilər.

Əliyalın insanlara hücum edən qaniçən ermənilər dəhşətli vəhşilik törətdi. Hələ tarix belə vəhşilik , belə dəhşət görməmişdi. Misli görünməmiş bu vəhşilik nəticəsində yüzlərlə insan qətlə yetirildi , yüzlərlə insan əlil oldu , yüzlərlə dinc sakin yaralandı, əsir götürüldü.

Düşmənlər öz çirkin əməllərini yenə davam etdirdilər . Qarabağın azərbaycanlılar yaşayan bir çox kənd və qəsəbələrini yandırdılar , dağıtdılar , yerləyeksan etdilər .

Qalan insanlar isə doğma yurd-yuvalarından didərgin düşdülər.

Soyqırım gecəsindən sonra məhv edilmiş şəhərin ətrafını , yolları , meşələri gəzən qaniçənlər , qandan doymayan erməni faşistləri meşələrdə , yollarda gizlənə bilən günahsız insanları – qocaları , qadınları , uşaqları tutub ağır işgəncələr verirdilər .

Sonra isə daha dəhşətli bir mənzərəyə şahid olduq.

Qaçıb canını qurtarmaq istəyən yaşlı babalar , nurani nənələrin , körpə uşaqların , gözəl-göyçək qız-gəlinlərin qarlı çöllərə səpələnmiş cəsədləri... Hətta günahsız insan cəsədləri belə , düşmən tərəfindən tanınmaz hala salınmışdı...

Unutmayaq tökülən qanları , qətlə yetirilmiş körpələri , qanına qəltan edilən ağbirçək nənələri , nurani babaları... Unutmayaq gözüyaşlı qalan anaları , bacıları...Unutmayaq şikəst olmuş , əsir düşmüş qardaş və bacıları...

Unutmayaq xaraba qalmış şəhərləri, kəndləri , dağıdılmış dədə-baba məzarlarını...

Vətənin bir qarışını belə , Vətənin bir daşını belə unutmayaq!

Hər il olduğu kimi bu il də Xocalı faciəsində dünyasını dəyişən günahsız insanların xatirəsini yad etmək məqsədilə Azərbaycanın bütün məktəblərində olduğu kimi, Bakı şəhəri 274 nömrəli tam orta məktəbdə də Xocalı faciəsinə həsr olunmuş dərslər , müxtəlif tədbirlər keçirilir , kompozisiyalar hazırlanır və qan yaddaşımızda əbədi qalan Xocalı faciəsi bir daha xatırlanır .

Yeganə ƏLİYEVA,

Bakı şəhəri, 274 nömrəli məktəbin müəllimi.

Oxunub: 451