Bənövşə ətri...

CANLI TV / 14.03.2023 03:56

"carciTV” TƏQDİM EDİR

Bənövşə ətri...

Ətirlərin fəslidir bahar. Quşların nəğməsində,həşəratların canlanmasında bir doğmalıq var. Çox uzaq olduğum yer başqa şəhərlər olub.Ən çox darıxıb,kövrəldiyim qaratoyuğun oxuması ,bənövşələrin ətri , bir də anamın qışdan sonra dərindən təmizlədiyi evimizin ,kraxmallı yorğan - döşəyin ətri.

İnsan zamanın dünya ilə vəhdətində bir köməkçidir. Zaman insanla yeriyir,dünya isə bu gedişə izləyici.Bəzən "Dejavu" yaşamaq kimi qəribə hisslərin haradan qaynaqlandğını tam təəssüratı ilə xatırlamağa çalışırıq.Bu xatirənin elə özüdür...

Bənövşə ətrini sevməyi valideynlərim öyrətmişdi.Uşağa nəyi daha çox aşılasan onu sevər. Bağımızdan gətirib həyətdə hasarın dibi ilə cərgəylə əkmişdi atam. Arabir gedib bir ovuc yığırdı, gətirib anama verərdi.O da stəkana su töküb,bir parça qənd salardı.Çiçəkləri qoyardı bu suya.Evimizə bənövşə ətri dolardı.

Yaşıdlarım olan qızlar bənövşələri dərman şüşələrinə yığıb,hansısa sehrli qüvvə ilə ətir də hazırlayardılar.Sehri onda idi ki, heç vaxt nə əlavə etdiklərini deməzdilər, mən də çox israr etməzdim.Çünki dar şüşələrdə işgəncəylə əzdikləri bənövşələri gördükcə ətriyyatçı peşəsinə acığım gələrdi.

Beləcə illər bənövşələrin bitib- solması kimi təkrarlandı və uzun zaman kəsiyindən sonra atam qocaldı. Ən pisi isə gözlərinin nurunu itirdi.Ömrünün son iki ilini sevdiyi təbiəti görmədi.

Yaşlı bir müəllim həmkarı vardı.Bizə tez-tez atamın ziyarətinə gələrdi.Hər dəfə maraqlı söhbətlər edər,çalışardı ki,atamın kədərli üzünü güldürsün.

Yaz gəlmişdi.Həmin müəllim yenə də ziyarətə gəldi.Əlində də bir dəstə bənövşə.Bənövşələri ətrini hiss edən atamın üzü güldü, qonağın ona uzatdığı çiçəklərin ətrini içinə çəkdi:-" Yaz gəlib...Hər yer yaşıldır yəqin...." Hamımız bu sözə kövrəldik.

Bir aydan sonra atamı itirdik.Amma bənövşələri saxlamışdım.Qurudub qoydum kitabın arasına.

Bir neçə il sonra həmin müəllim işlədiyim kitabxanaya gəldi ,söhbət zamanı hər nəyə varsa şeir yazdığını,tək bənövşəyə şeir qoşa bilmədiyini etiraf etdi.

Zaman və insanlar dəyişir,dünya isə izləyir.Yenə bahar gəlir,yenə bənövşə ətri bürüyür hər yanı....

Natavan İBRAHİMOVA,

Qəbələ rayonu, Xırxatala kənd kitabxanasının müdiri.

Oxunub: 458