Katolik və protestantlar Pasxa bayramını qeyd edirlər

CANLI TV / 09.04.2023 21:48

Aprelin 9-da katolik və protestantların Pasxa bayramı qeyd olunur

"carciTV" xəbər verir ki, xristian aləminin ən ali bayramı – Pasxa bayramı günündə Vatikanın Müqəddəs Pyotr meydanında katoliklərin ruhani lideri Papa Fransisk "Papamobile” adlı avtomobili ilə meydana toplaşanları salamlayıb. Roma Katolik Kilsəsinin rəhbəri ənənəvi "Urbi et Orbi” ("Romaya və dünyaya”) bayram xeyir-duasını oxuyub, çıxış edib və Pasxa təbrikini çatdırıb.

Təxminən 45 min insanın meydandan izlədiyi mərasimdə Papa Fransisk bu Pasxa bayramının da müharibə ilə qarşılandığını, bütün dünyada, xüsusilə Ukraynada sülhün bərqərar olmasının vacibliyini vurğulayıb. Pontifik müxtəlif qitələrdə terror, zorakılıq və qarşıdurma kimi hadisələrə son qoyulması barədə arzusunu ifadə edib.

Papa Fransisk sülhə daha çox ehtiyac duyulduğunu, sülhün hər kəs üçün zəruri və prioritet məsuliyyət olduğunu qeyd edib. O, Türkiyə və Suriyada şiddətli zəlzələdən zərər çəkənlər üçün dua edib, hər kəsi bu xalqlarla həmrəylik nümayiş etdirməyə çağırıb.

Bundan başqa İtaliya Prezidenti Sercio Mattarella Pasxa bayramı münasibətilə Papa Fransiskə təbrik məktubu göndərib. Sercio Mattarella məktubunda Rusiya-Ukraynaya müharibəsi, dünyanın müxtəlif bölgələrini bürüyən böhran ssenariləri fonunda Roma Katolik Kilsəsinin rəhbərinin dialoqu və qarşılıqlı anlaşmanı, xalqlar arasında sülhü təbliğ edən çağırışlarının əhəmiyyətini vurğulayıb.

Oxunub: 221