Ermənistanın Azərbaycana qarşı təxribatları intensivləşir

Ermənistan silahlı qüvvələri və Azərbaycan ərazisindəki cinayətkar rejimin tör-töküntüləri tərəfindən ölkəmizə qarşı həm şərti sərhəddə, həm də Azərbaycanın Qarabağ iqtisadi rayonunda törədilən təxribatlar getdikcə daha da intensivləşir və onların coğrafiyası genişlənir.

"carciTV" xəbər verir ki, son aylar baş vermiş təxribatların sayında müşahidə edilən artım da bunu bir daha göstərir.

Belə ki, əgər bu ilin iyul ayında Ermənistan-Azərbaycan şərti sərhədində və Azərbaycanın Qarabağ iqtisadi rayonunda törədilmiş təxribatların ümumi sayı 28 idisə (şərti sərhəddə - 12, Qarabağ iqtisadi rayonunda – 7, kvadrokopter və dron tətbiqi - 1, fortifikasiya işləri - 6, digər təxribatlar - 2), avqust ayında onların ümumi sayı 45-ə çatıb (şərti sərhəddə - 17, Qarabağ iqtisadi rayonunda – 3, kvadrokopter və dron tətbiqi - 4, diversiya qruplarının fəaliyyəti – 2, fortifikasiya işləri - 11, digər təxribatlar - 8). Sentyabr ayında isə təxribatların sayı kəskin surətdə çoxalıb. Belə ki, hələ ayın cəmi təqribən yarısını geridə qoymağımıza baxmayaraq, Ermənistan silahlı qüvvələri və Azərbaycan ərazisindəki cinayətkar rejimin tör-töküntüləri tərəfindən törədilən təxribatların sayı artıq 61-ə çatıb (şərti sərhəddə - 29, Qarabağ iqtisadi rayonunda – 3, kvadrokopter və dron tətbiqi - 6, diversiya qruplarının fəaliyyəti – 1, fortifikasiya işləri - 18, digər təxribatlar - 4).

Bütün bunlar göstərir ki, Ermənistan Azərbaycanın irəli sürdüyü sülh təklifini qəbul etmir, bölgədə vəziyyəti qəsdən gərginləşdirməkdə maraqlıdır. Ermənistanın təxribatlarının qarşısını almaq məqsədilə Azərbaycan Respublikasının Silahlı Qüvvələri bütün lazımi tədbirləri görür və bundan sonra da görəcək. Azərbaycan tərəfi dəfələrlə bəyan edib ki, vəziyyətin qəsdən gərginləşdirilməsinə görə bütün məsuliyyət Ermənistanın hərbi-siyasi rəhbərliyinin üzərinə düşür.