Tərtər II Dünya müharibəsindən sonra Avropada ən çox bomba və raketin atıldığı şəhərlərdən biridir

Tərtər rayonunda fəaliyyət göstərən idarə, müəssisə, təşkilat kollektivləri, ictimaiyyət nümayəndələri, şəhid ailələri, qazilər 2020-ci il oktyabrın 29-da şəhərin Elman Səfərov küçəsinə erməni separatçıları tərəfindən atılan "Smerç” raketi nəticəsində dağılmış Sahib İsmayılova məxsus açıq havada fəaliyyət göstərən ev-muzeyinə ekskursiya ediblər.

"carciTV" xəbər verir ki, əvvəlcə muzeyin həyətində mülki şəhidlərin şəkillərindən ibarət fotoguşə ziyarət olunub, önünə gül-çiçək dəstələri düzülüb.

Tərtər Rayon İcra Hakimiyyətinin başçısı Müstəqim Məmmədov bildirib ki, 44 günlük Vətən müharibəsində Ermənistan silahlı birləşmələri beynəlxalq hüquq normaları ilə müəyyən olunmuş qaydaları pozaraq, Tərtər şəhəri də daxil olmaqla, rayonun yaşayış məntəqələrinə 16 min 277 top, tank, qrad mərmisi, 21 qadağan olunmuş raket atıb, bəzi günlərdə Tərtərə 2000-dən çox mərmi düşüb.

Qeyd olunub ki, erməni nasizminə qarşı Azərbaycanın Stalinqradı adlandırılan Tərtər şəhəri II Dünya müharibəsindən sonra Avropada ən çox bomba və raketin atıldığı şəhərlərdən biridir.

Tədbirdə erməni terrorçularının törətdikləri terror hadisələrində həlak olan mülki şəhidlər barədə də məlumat verilib. Bildirilib ki, 2020-ci il oktyabrın 15-də şəhər qəbiristanlığında dəfn mərasimində iştirak edən 4 nəfər mülki şəxs Ermənistan silahlı qüvvələrinin atdığı raket nəticəsində həlak olub, 4 nəfər yaralanıb. Ümumilikdə, 44 günlük Vətən müharibəsində Tərtər rayonunun yaşayış məntəqələrinin atəşə tutulması nəticəsində mülki vətəndaşlardan 16 nəfər həlak olub, 63 nəfər yaralanıb. Yaşayış evlərinə, qeyri-yaşayış sahələrinə, sosial obyektlərə, məktəb, xəstəxana və uşaq bağçalarına, kənd təsərrüfatına ziyan dəyib. Ancaq tərtərlilər bir gün də olsun öz doğma yurdlarını və ev-eşiklərini tərk etməyib, evləri dağılsa da, şəhidlər versə də, ön cəbhədə olduğu kimi arxa cəbhədə də qəhrəmanlıq, şücaət göstəriblər. Bu gün ekskursiya təşkil edilmiş ev muzey də erməni vandalizminin bariz nümunəsidir.

Diqqətə çatdırılıb ki, 2020-ci ildə 44 günlük Vətən müharibəsində Azərbaycan Ordusunun qələbəsi tarixin səhifələrinə qızıl hərflərlə yazıldı. Bu ilin sentyabr ayının 19-da həyata keçirilən lokal xarakterli antiterror tədbirləri zamanı cəmi 23 saat 43 dəqiqə ərzində erməni terrorçuları ağ bayraq qaldıraraq təslim oldular. Xalqımız oktyabrın 15-də Prezident, Müzəffər Ali Baş Komandan İlham Əliyev tərəfindən əzəli torpaqlarımız olan Xankəndi, Xocavənd, Xocalı, Ağdərə şəhərlərində, eləcə də Əsgəran qəsəbəsində üçrəngli Dövlət Bayrağımızın ucaldılmasını qürur və iftixar hissləri ilə qarşıladı.